Anija e Marinës meksikane që u përplas në urën e Bruklinit ka të ngjarë të ketë pësuar një ‘problem mekanik’ përpara se të humbte fuqinë, sipas policisë.

Anija masive e trajnimit Cuauhtémoc, që mbante një ekuipazh prej 277 personash, u përplas në urën ikonike të Nju Jorkut rreth orës 9 të mbrëmjes të shtunën.

Dy anëtarë të paidentifikuar të ekuipazhit humbën jetën pasi ranë nga direkët në kuvertën e anijes, transmeton Telegrafi.

Një total prej 22 anëtarësh të ekuipazhit janë raportuar të lënduar deri të dielën në mëngjes, me të paktën 11 në gjendje kritike, thanë zyrtarët e Marinës meksikane.

Pas incidentit tragjik, shefi Wilson Aramboles i Byrosë së Operacioneve Speciale i policisë së Nju Jorkut tha se ‘disa probleme mekanike’ ka shumë të ngjarë të kenë shkaktuar që anija të godasë urën.

Kapiteni që po manovronte anijen humbi, mendoj, fuqinë e anijes’, u tha Aramboles gazetarëve, ndërsa këshilloi se informacioni ishte paraprak.

Një grafik i postuar në X duket se tregonte anijen masive duke humbur fuqinë dhe duke ngecur në ujë pak para se të arrinte në urë.

Të dhënat tregojnë se anija u shkëput në Portin Detar në Lower Manhattan rreth orës 8:20 të mbrëmjes, pranë një rimorkiatori.

Më pas u pa duke humbur me shpejtësi kontrollin ndërsa filloi të lëvizte prapa drejt urës së Bruklinit.

Vetë anija po lëvizte në “drejtimin e gabuar” kur u përplas në urë, tha për median një zyrtar i lartë i qytetit pranë hetimit.

Anija Cuauhtémoc ishte gati të ndalonte në një skelë furnizimi me karburant në Bay Ridge, pasi u largua nga skela atë natë përpara se të nisej në det për në Islandë, tha zyrtari.

Kapiteni i anijes u tha hetuesve se humbi kontrollin e anijes pasi timoni – një pjesë e bashkangjitur pranë pjesës së pasme të anijes për drejtim – u fik.

“Ata kishin një lloj problemi mekanik, humbën energjinë, kështu që pa qenë në gjendje të përdornin timonin, nuk mund të drejtonin”, zbuloi zyrtari.

Një ekspert transporti i tha mediave amerikane se regjistruesi i të dhënave të udhëtimit të anijes, do të ofrojë informacion të rëndësishëm rreth asaj që shkoi keq pak para përplasjes. /Telegrafi/